Dende o Grupo Operativo MICOALGA-FEED, no que participamos, organizamos o vindeiro xoves 9 de febreiro en Xixón, unha xornada técnica presencial que inclúe unha visita demostrativa a Neoalgae, empresa participante no proxecto de innovación.
Iniciado en 2021 cunha duración de máis dous anos, o proxecto MICOALGA-FEED (“Redución de antibióticos en gandería mediante o desenvolvemento de pensos enriquecidos con fungos e microalgas”), está próximo a finalizar. No marco das actividades de peche do proxecto, organízase esta xornada técnica para dar a coñecer os principais resultados obtidos. A falta de que finalicen os últimos ensaios in vivo, os pensos desenvolvidos demostraron posuír capacidade inmunomoduladora e antiinflamatoria, potenciando a saúde do animal e reducindo o seu risco de enfermidade.
A xornada, coordinada por Neoalgae e FEUGA, e que conta coa participación do resto de socios (Hifas Veterinary, Grupo Uvesa e o Centro Tecnolóxico AINIA), servirá para dar a coñecer os principais resultados e conclusións extraídos nas diferentes actividades que se levaron a cabo. Ademais, como peche, realizarase unha visita guiada polas instalacións de Neoalgae, empresa participante no proxecto e cuxa actividade se centra na produción e procesamento de diferentes especies de microalgas. Esta visita permitirá descubrir, da man dos propios investigadores, os equipos de produción e procesamento, así como as metodoloxías empregadas. Tamén as numerosas aplicacións e beneficios das microalgas nunha infinidade de sectores.
Á xornada, que se celebra en Xixón, tamén se poderá asistir de maneira telemática. En calquera caso, a asistencia é totalmente gratuíta, previa inscrición. Máis información na web do proxecto MICOALGA-FEED:
- Cando: Xoves 9 de febreiro de 2023
- Onde: Edificio IMPULSA, Xixón, Asturias.
- Modalidade: dual (presencial e online)
- Inscricións gratuitas: https://forms.office.com/e/jS2YXCX2Cb
MICOALGA-FEED é un proxecto de innovación cofinanciado nun 80% polo Fondo Europeo Agrícola de Desenvolvemento Rural (FEADER) da Unión Europea e nun 20% polo Ministerio de Agricultura, Pesca e Alimentación, no marco do Programa Nacional de Desenvolvemento Rural 2014-2020. A Dirección Xeral de Desenvolvemento Rural, Innovación e Formación Agroalimentaria (DGDRIFA) é a autoridade encargada da aplicación das devanditas axudas. Orzamento total do proxecto: 523.259,66€, Subvención total: 505.519,66€.
GO MICOALGA-FEED é a entidade responsable do presente contido.
